Na tutym městnje steješe prěni Serbski dom w Budyšinje.
Direktnje napřećo Serbskemu ludowemu ansamblu steješe stary Serbski dom. Jan Arnošt Smoler, sobuzałožer serbskeho wědomostneho towarstwa „Maćica Serbska“, je w lěće 1873 płoninu na róžku Lawske hrjebje/ Wonkowna Lawska dóha kupił. Na tutym arealu natwarichu po naćiskach Drježdźanskeho architekta Grothe impozantne twarjenje. W lěće 1904 so tutón dom jako centrum za serbske kulturne žiwjenje wotewri. W rumnosćach běchu Serbski muzej, Serbska biblioteka a archiw zaměstnjene. Tež sportowe towarstwo Serbski Sokoł, Serbska ludowa banka a Smolerjec kniharnja mějachu tu swoje sydło. Wot lěta 1912 namaka třěšny zwjazk Domowiny tu swój domicil. Na kóncu Druheje swětoweje wójny so twar dospołnje zniči. Mehr