Cyrkej swj. Pětra
Cyrkej swj. Pětra liči k najstaršim a najwjetšim simultanowym cyrkwjam Němskeje. Naposledk bu twar 2015 restawrowany.
Na najwyšim městnje města Budyšin, na Mjasowych wikach, steji Pětrowa cyrkej. Ličimy ju k najstaršim a najwjetšim simultanowym cyrkwjam Němskeje. Twar pochadźa z 10. lětstotka. Z tym su Mjasowe wiki jedyn z najstaršich cyrkwinskich městnow w Hornjej Łužicy. W 15. lětstotku dósta tachantska cyrkej swój dźensniši wonkowny napohlad. Barokowa hawba wěže bu w 17. lětstotku natwarjena. Z časa reformacije wužiwa so cyrkej runoprawnje wot romsko-katolskich a ewangelsko-lutherskich wosadnych. W běhu stawiznow bu tež sakralny twar nutřka wjacore razy přetwarjeny a wobnowjeny. Hač do dźensnišeho wotměwaja so w Božim domje prawidłownje serbske mšě a kwasy. Tež za kulturne zarjadowanja so Pětrowa cyrkej wužiwa. Njeličomne koncerty ze serbskej a němskej koncertnej literaturu kaž tež předstajenja oratorijow su tu słyšeć. Na jutrowničce kónči so při cyrkwi Budyski serbski křižerski procesion, kotryž so z Radworja nawróći. Mehr
